As actividades ofertadas nos diferentes centros de maiores de Afundación varían en función da demanda dos seus socios. A entidade galega establece a súa programación en relación coas necesidades e con esa demanda; as clases máis solicitadas son todas aquelas que traballan a saúde e a forma física, seguidas dos idiomas e a formación en novas tecnoloxías. O apartado de viaxes ten tamén unha grande aceptación entre os socios destes centros. Por iso a entidade galega oferta para o novo curso 2014-2015 un completo programa específico e adaptado a cada un dos seus doce centros de maiores. Entre as actividades destacan exercitación da memoria, ximnasia natural, ioga, Pilates, estrés e control da ansiedade, danza, bailes de salón, clases de inglés, francés, alemán e portugués, debuxo artístico, talleres de reciclaxe, etcétera.

Afundación tivo sempre entre as súas prioridades a atención ao colectivo de persoas maiores por medio de programas innovadores e en permanente evolución. Estes desenvólvense nos doce centros da fundación repartidos por toda a xeografía de Galicia, unha comunidade, que presenta un índice de envellecemento cinco puntos por enriba do resto de España. As actuais liñas de traballo da fundación neste campo son o envellecemento activo e a promoción da autonomía persoal a través dunha lista de servizos que se programan dende a propia rede de centros tales como os citados ou ximnasia articular, pintura, teatro, canto, informática, internet xunto con propostas máis ligadas ao benestar como a podoloxía.